رواية موضوع عائلي الفصل الحادي عشر 11 بقلم رحاب القاضي

 رواية موضوع عائلي الفصل الحادي عشر 11 بقلم رحاب القاضي

#موضوع_عائلي

_الحلقه الحاديه عشر

ـــــــ ـــــــ ـــــــ ـــــــ ـــــــ ـــــــ 

_ عدي يوم في التاني وكان كل واحد في ابطالنا مشغول في حياته ومستني اللي الايام مخبياه ليه.. 

_ في قاعه راقيه جداً كان واقف يونس مع نور وهما بيرقصو مع بعض بهدوء علي اغنيه هاديه.. 

يونس

اهو الخطوبه في قاعه عشان ما تزعليش، مع اني كنت عايز افرح وسط اهل حتتي.. 

نور

ما انت جيبتهم اهو يا حبيبي وبياكلو جاتو ومبسوطين، ممكن بقي تسيبني افرح.. 

يونس

يا مفتريه بقي بقولك حاضر علي كل اللي طلبتيه وفي الاخر تقوليلي سيبني افرح كل ده ومش سايبك تفرحي.. 

نور قربت منه وقالت

اصلا فرحتي اللي بجد اننا اتخطبنا رسمي قدام الناس كلها.. 

يونس بهدوء

امم طيب فرحتك دي اكتر ولا فرحتك بكلية الطب اللي لسه مقدمالها من يومين اكتر.. 

نور ابتسمت وقالت

وهي كلية الطب دي من غير وجودك في حياتي تسوي حاجه، انا مبسوطه عشان خلاص بقيت علي اسمك رسمي.... 

يونس ابتسم وقال

انتي الفرحه الوحيده اللي في حياتي، انتي اللي الحاجه اللي بتخلي يونس عايش يا نور.. 

_ فاق يونس من ذكرياته وهو ماسك موبيله وبيتفرج علي صور خطوبته هو ونور، ومسخ دموعه وفضل يحذف في الصور وقال.. 

يونس

كدب كل كلمه منك كانت كدب.. 

_ وباب اوضته خبط ودخل عنده حامد وقاله بضيق..

حامد 

انت ايه علاقتك بالواد اللي اسمه بهنسي مفتاح ده؟... 

يونس بجمود

مصلحه كده يا حج هبقي اقولك عليها بعدين، خير هو ده اللي جايبك عندي؟.. 

دخل حامد وقعد قدامه وقال بهدوء. 

ولا حاجه بس جاي اقولك ان العروسه اللي هنروح نخطبها النهارده هي اللي تناسبك.. 

بصله يونس بجمود وقال

سألت عليها زي ما انت قولتلي وفعلا بنت كويسه ومناسبه.. 

حامد 

انت راضي بيها؟..  

يونس بجمود

اهي جوازه وخلاص ومناسبه انت طول عمرك بتختارلي الحاجه المناسبه يا معلم حامد.. 

حامد بهدوء

زمان كنت مش متعلم ما دخلتش مدارس اصلا ومتربي في الشارع بقيت كبير الحته دي بدراعي الحكومه نفسها اتعاونت معايا بقيت اي مصلحه عايزين يخلصوها في اي منطه بساعدهم ومقابل كده اتخانق اعور اعمل اللي عايزه ما حدش يقولي حاجه.. 

يونس بعدم فهم 

بتقولي كده ليه دلوقتي؟.. 

حامد بضيق

حبيت زيك بس حبيت برضو الشخص الغلط بنت شيخ الجامع المتعلمه اللي متربيه هناء ست بنات الحته كلها وروحت اتقدمتلها هي رفضتني وابوها وامها كمان... 

يونس بسخريه

فرحت اتجوزتها عافيه بقي... 

حامد ابتسم وقال 

ده انا خليتها هي اللي جات وطلبت كده مني بعد ما كسرت ابوها وخليته راقد في فرشته، وبعد ما اتجوزتها كانت ديما بتفضل تحسسني اني اقل منها وانها عايشه معايا مغصوبه كانت نار تقوم جوايا لما بتتصرف معايا كده كانت بتعرف تكيدني بنت الجز*مه ، روحت بقي متجوز امك عليها وقولت ما يكسرش الست غير ست زيها.. 

يونس باهتمام 

واللي حصل ايه بقي؟.. 

حامد ضحك وقال

قوت امك عليا صاحبتها وبقيو زي الاخوات هما الاتنين ده انا حتي كنت الاول بضربها واعدمها العافيه لما جات امك بقيت تدافع عنها كانت طيبه اووي امك اتجوزتها عيله صغيره عندها 16سنه بس المرض اياااه حرمني منها بدري... 

اتنهد حامد وقال

خلاصة كلامي ان نور مش هي اللي هتريحك كنت هتعيد اللي حصل زمان تاني، فاختصر الطريق واتجوز اللي تناسبك وتريحك يا ابني.. 

يونس بدموع

عارف يا حج كنت ممكن تريحني انت بانك تخليني متعلم وعارف ديني مش بلطجي واخوف الناس زي ما حصل كده، وقتها كنت هتغير القديم انما انت عدت اللي حصل فيك فيا بالظبط بس الفرق بيني وبينك انا عندي قلبي تحت رجلي وكرامتي فوق راسي وما اقبلش واحده غصب عنها.. 

وقف حامد وقال

انا عملتلك الصح يا يونس كنت هخلي محمد مكانك او معاك بس منها لله فرقتكم، المهم النهارده الساعه سبعه هنروح المشوار بتاعنا ده وربنا يتمم بخير... 

_ قال كلامه حامد وطلع من عند يونس، وهو رد علي موبيله اللي بيرن وقال.. 

يونس

 ايوه يا مفتاح وصلت للي قولتلك عليه طيب تمام،،، لا انا اللي هعمل كده بنفسي.. 

 ـ تفتكرو يونس بيخيطط لايه؟... 

ـــــــ #بقلم_الكاتبه_رحاب_القاضي ـــــــ 

_ وفي بيت الشيخ محمد كانت هاجر بتحاول تفتح موبيلها بس ما كانش بيفتح معاها خالص وقالت بصوت عالي لمحمد اللي كان في الحمام.. 

هاجر

محمد ايه الباسورد بتاعك عايزه اكلم البت ولاء.. 

محمد 

من واحد. لاربعه.. 

هاجر بسخريه 

ده ايه الرمز الصعب اووي ده.. 

_ واول ما فتحت الموبيل لقيته علي شات في الماسنجر بينه وبين واحده، سابت الموبيل وراحت خبطت علي باب الحمام وقالت.. 

هاجر

انت يا شيخ انت اطلعلي.. 

محمد 

دقيقه وطالع يا هاجر في ايه؟.. 

هاجر قعدت علي السرير وقالت

ماشي يا ابن هناء اما نشوف الدقيقه دي هتخلص امتي... 

_وطلع محمد بعد شويه وهو بينشف شعره بالفوطه وكان شكله فعلا لطيف وقال. 

هاجر

خير يا جوجو في ايه؟.. 

هاجر بتوتر

ها لا لا علي فكره مش هتوترني وانسي اللي شوفته، واسمي هاجر... 

ابتسم محمد وقال

نعم  طيب في ايه؟.. 

هاجر فتحت موبيله وقالته

بتخوني يا شيخ محمد لييه ده انا توقعت الخيانه من الكل الا انت.. 

محمد بسخريه

بس يا هبله واطلعي جهزي فطار.. 

هاجر 

ايه الرد الغريب ده، لا مش هتعدي كده ممكن تقولي مين الهانم دي.. 

بص محمد للفون وقال 

ما اعرفش مين دي؟.. 

هاجر بحده 

انت هتجنني اومال بتكلمها ليه وانت مش عارف اسمها ما تكذبش عليا؟.. 

محمد

انتي شيفاها كاتبه اسمها، دي كاتبه ملكه بنقابي.. 

هاجر بحده 

اكيد قالتلك اسمها، بص انت شيخ محترم ما تخلنيش اقل منك وقولي مين دييي؟.. 

ضحك محمد وقال

ههههههه والله العظيم ما اعرف اسمها ،كل اللي بينا الكام كلمه اللي قدامك دول.. 

هاجر بغيظ 

وتكلمها ليه اصلا، اخص اخص عليك بتاع بنات يا شيخ محمد.. 

محمد قعد علي الكنبه وهو بيضحك وقال

هههههه يا بنتي هو في ايه دي بتقولي هتطلع لايف امتي وقولتلها علي المعاد فعرضت عليا اذكر اسم الجروب بتاعها هي وصحابها للبنات عشان يدخلو فيه مش اكتر.. 

هاجر بعدم فهم 

هو انت بتطلع لايف؟... 

محمد 

ايوه كل يوم جمعه الساعه تمنيه بالليل في جروب عامله انا وواحد صاحبي شيخ برضو وبننصح الشباب والبنات وبنقدم ليهم معلومات دينيه ونصايح وزي ما استفدت من علمي ودراستي  في علاقتي بربنا بفيد غيري.. 

هاجر ابتسمت وبعدين كشرت وقالت

معلش طيب بعد كده تخلي مراتك هي اللي ترد علي البنات.. 

محمد بسخريه

انسي يا ماما بقي عايزاني اخليكي انتي بدماغك دي تردي علي المتابعين بتوعي.. 

هاجر بغيظ

بقي كده؟.. 

محمد قام وقال

ايوه واوعي كده عايز اظبط شعري وانزل.. 

هاجر بحده

طيب امسك موبيلي باظ هاتلي واحد جديد بس.. 

محمد بهدوء

هصلحه ليكي وهيبقي زي الفل يا هاجر، مش معايا اجيبلك دلوقتي جديد لما ازبط اموري.. 

هاجر بحده 

ايوه ما هو لو كانت ملكه بنقابها دي كنت هتحيبلها  ماشي... 

_جات تمشي بس محمد مسك ايدها وقربها ليه وقال بهدوء... 

محمد 

نحس شويه انا بظبط في الشقه فوق ومش هاخد.من امي حاجه تمام ومصاريف البيت غير مازن اللي عايز موتسيكل جديد نقدر بعض، وبعدين هو انتي بتغيري عليا؟... 

هاجر بتوتر 

اا لا مم مش بغير يعني وو.. 

محمد

مش بتغيري متأكده؟.. 

هاجر بغيظ 

ايوه بغير عليك ورد علي اللي ترد عليها بس قدامي.. 

ابتسم محمد وقال

حاضر يا ستي اللي عايزااه.. 

بعدت عنه هاجر بسرعه وقالت

المسلسل، هروح احضر المسلسل ابقي جهز انت فطار لنفسك.. 

اتنهد محمد بغيظ وقال

لا وعلي ايه هفطر تحت في المحل.. 

_ وطلعت تتفرج علي التلفزيون ومحمد طلع هو كمان وقبل ما ينزل قرب منها وباسه في خدها وقال..

محمد

هتوحشيني..

هاجر ابتسمت وقالت

احم وانت كمان امشي بقي عشان امك طالعه..

_ ضحك محمد وطلع وجات فعلا هناء ومسكت الريبوت وقلبت علي المسلسل وجابت برنامج...

هاجر

يا حجه ابقي هاتي البرنامج بعد ما المسلسل يخلص..

هناء

لا ما هيكون  البرنامج خلص يا سرنجه،وبعدين ما روحتيش شغلك ليه وريحتيني منك؟... 

هاجر بغيظ

اجااازه وبقولك ايه انتي تبطلي تقولي عليا سرنجه دي سامعه ولا لا، ومش عايزه اشوف معاكي حاجه انا هروح اشوف هعمل ايه غدا.. 

_خلصت كلامها وجات تدخل المطبخ بس الباب خبط، وهناء قالت.. 

هناء

انتي رايحه فين يا سرنجه روحي افتحي الباب يلااا.. 

هناء

اشوف فيكي يوم يا شيخه اللهي يارب سرنجه تفضل تشكشك فيكي لحد ما تقولي يا بس.. 

_ وفتحت الباب وكانت ريهام اللي بصتلها من فوق لتحت وقالت.... 

ريهام

حماتك جوه يا مدام؟.. 

اتنهدت هاجر بضيق وقالت

ايوه اتفضلي، بس مازن مش موجود علي فكره.. 

_ قالتلها هاجر كده وبصتلها من فوق لتحت بقرف وبعدين دخلت المطبخ، وريهام دخلت وقعدت مع هناء.. 

ـــــــ #بقلم_الكاتبه_رحاب_القاضي ـــــــ 

_ وفي بيت صبري، كانت شهد قاعده في اوضتها مدايقه ودخل عندها صبري بعد ما خبط وقال.. 

صبري بحده 

قاعده زي اللي وليه اللي بيتها خربان كده ليه يا بت؟.. 

شهد بدموع

كمان اقعدلك ازاي عشان ترضي؟.  

دخلت زهره وقالت

يا بت ردي كويس علي اخوكي هو قصده يعني قومي خدي دوش كده وظبطي نفسك عشان العريس اللي جاي بالليل... 

_نزلت دموع شهد وسكتت، وصبري دخل وقعد قصادها وقال بضيق... 

صبري 

تقيل عليكي تريحي اخوكي يا شهد، بقي ده منظر عروسه النهارده احتمال كبير تبقي قراية فاتحتها.. 

شهد بصتله وقالت بحده 

بلاش والنبي الشويتين دول وتيحي تعمل فيها اخويا الكبير وسندي والجو ده، عشان انت عمرك ما كنت ليا اخ ولا سند اتسند عليه بعد. ربنا انت طول عمرك شيطان بالنسبالي.. 

صبري بعصبيه

انا يا شهد ده بيطلع عين اهلي عشانك انتي وابني وبقول بنتي مش اختي.. 

_قام وفتح الدولاب بتاعها وطلع هدومها كلها ورماهم في وشها وزعق فيها وقال.. 

صبري

انا ببقي واقف علي رجلي اليوم كله والله واعلم بحالي وبجيبلك اللي نفسك فيه ما فيش واحده في الحته عندها ربع اللي عندك وبتحرقي دمي وبتطلعي بالاسود في اسود زي الفقر، زعلانه يا اختي عشان كنت بقولك ما تطلعيش كتير ما تروحيش عند صحابك وهما اللي يجولك... 

اتملت عيونه دموع وقال

ما انا لو كنت بعمل كده عشان كنت خايف عليكي 

لو كانت حصلتلك حاجه ما كنتش هقدر احميكي ولا اجيبلك حقك وانا في الدنيا دي بطولي لا ليا قريب ولا غريب ارمي عليه همي.. 

زهره بحزن 

خلاص يا صبري ورحمة ابوك وامك خلاص الناس تقول علينا ايه بس واحنا كل يوم والتاني صوتنا طالع كده..  

صبري بحده 

اسمعي يا بت انتي انا تعبت منك الناس بالليل هيجو وهتقابليهم وتفردي خلقة اهلك دي والجوازه هتم يا شهد برضاكي او غصب عنك هتم.. 

_ قال كلامه وطلع وراحت وراه زهره وشهد فضلت تعيط بقلة حيله... 

ـــــــ #بقلم_الكاتبه_رحاب_القاضي ـــــــ

_ وفي الحاره كان مازن قاعد علي القهوه وبيحاول يكلم ولاء بس مش بترد لا علي مكالماته ولا رسايله، وجنبيه كان قاعد يوسف اللي جه يونس وقعد جنبيه وقال...  

يونس

مزعل امك ليه يااه؟.. 

يوسف بضيق

يعني مش عارف ليه يا يونس؟.. 

يونس

وفيها ايه يا عم اما تقولي انها محتاجه مبلغ عشان تكمل جهاز اختك، هو انا مش اخوك ياد ولا ايه؟.. 

يوسف بضيق 

بس مش بالطريقه دي يا يونس مش كفايه اللي جيبته ولا الحاجات اللي بتبعتها كل شهر.. 

يونس بحده 

وربنا يا يوسف لو اتكلمت كده تاني ليبقي اخر ما بينا يا جدع، انت اخويا يااه واخويا الوحيد كمان.. 

بص يوسف لمازن اللي سرحان في موبيله وقال

اخوك ده بصراحه شايف نفسه اووي، تقول يا اخي اللي خلقه ما خلقش غيره.  

اتنهد يونس وقال

وحياتك علي الفاضي ده مصيبه ده وو.. 

_ سكت لما شاف احمد خطيب نور وقف بعربيته الغاليه جداً تحت بيت نور وطلع منها وكان لابس نضارة شمسيه وباصص في موبيله.. 

يوسف بقلق

طيب ما تيجي نمشي من هنا ونروح الموقف.. 

يونس بصوت عالي

هاتلي شاي وشيشه من عندك يا ابني.. 

_ بصله مازن بأهتمام وبص لاحمد اللي واقف مستني نور وفضل متابع اللي بيحصل باهتمام.. وكان جنبيهم قاعد علي ابن عم بطه بنت عظيمه ومعاه كمال ابن رضوان الحديدي اللي يونس اتخانق معاه يوم فرحه وقال.. 

كمال

شايف قاعد زي خيبتها ازاي بعد ما البت اديته علي قفاه.. 

علي

بقولك ايه خلينا في حالنا بلاش مشاكل.. 

كمال 

اقسم بالله حامد الصاوي ما خلف رجاله اذا كان يونس ولا اخواته الشيخ والواد الطري اللي قاعد ده.. 

_ كان مازن هيقوم يتخانق معاه بعد ما سمع كلامه، بس لقي كمال قام وقرب من احمد وقاله.. 

كمال 

اهلا اهلا بالعريس منور الحته والله.. 

احمد 

اهلا يا حبيبي.. 

كمال 

والله انت هتتجوز ست بنات الحته كلها، ادب واخلاق وجمال وعلام كمان.. 

احمد 

اكيد طبعاً.. 

_ ونزلت نور من غير ما تبص لحد واحمد فتحلها باب العربيه وركبت وهو كمان ركب من الناحيه التانيه ومشي، وكمال فضل يضحك اووي وكان معدي من قدام يونس اللي حط رجله قصاده ووقعه علي الارض.. 

قام كمال وقال بعصبيه

انت اتجننت ايه اللي عملته د... 

_ قبل ما يكمل كلامه وقف يونس ومسكه من هدومه وخبطه بضهره في الحيطه وطلع المطوه بتاعته وحطها علي رقبة كمال وقال بحده.. 

يونس

جو التلقيح بالكلام ده يا حيلتها بتاع النسوان، وتعمله علي اي حد الا يونس الصاوي... 

كمال بخوف 

ابعد السلاح يا يونس رقبتي اتعورت.. 

يونس بغضب

وهقطعهالك خالص لو اتكررت والكلام للكل اللي قد ربع كلمه تتقال علي المعلم يونس الصاوي يوريني نفسه.. 

_ الكل سكت ويونس زق كمال اللي وقع علي الارض وبص لمازن اللي كان باصلله ومبتسم من غير ما ياخد باله وقال. 

يونس بحده 

مفهوم الكلام؟.. 

مازن بتوتر

ااا انا جيبت سيرتك اصلا يا عم.. 

_ سابه يونس وراح قعد جنب يوسف اللي كان بيشرب الشاي بتاعه بهدوء وقاله.. 

يونس

متربي انت مش كده؟... 

يوسف

لا الاكشن ده ماليش فيه لو عايزني معاك اشتم وازعق اوكي غير كده مش هتلاقيني..  

_ ضحك يونس هو ويوسف وبص بطرف عينه لمازن وابتسم بهدوء.. 

ـــــــ #بقلم_الكاتبه_رحاب_القاضي ـــــــ

_ في الفيلا اللي فيها بيت احمد، كانت نور قاعده معاه هو ومامته.. 

ثريا 

احمد سيبنا لوحدنا شويه.. 

احمد بقلق

طيب يعني نور.. 

ثريا بحده 

احمد اسمع الكلام انا عايزه اتكلم معاها واحنا لوحدنا... 

_قام فعلا احمد مشي ونور كانت متوتره جدا ونظرات ثريا الثابته ليها خوفتها اكتر... 

ثريا 

حلو الخاتم الالماظ ده، احمد ابني ذوقه حلو اووي في المجوهرات.. 

نور ردت عليها وقالت

اا ايوه فعلا.. 

ثريا بجمود

انا ايه اللي يخليني ارضي بوحده زيك لابني؟.. 

بصتلها نور بدموع فضحكت ثريا وقالت

هههههه ما تخافيش انتي هتتجوزيه لانه عايزك، بس هتتجوزيه بشروطي انا... 

نور بقلق

شروطك ازاي بعني انا مش فاهمه حضرتك؟.. 

ثريا بثبات 

الاسطي فايز الست فايزه دول ما يدخلوش بيتي ولا يظهرو لاي حد من معارفنا.. 

ادايقت نور وقالت

ازاي يعني دول اهلي، انتي عايزاني اتبري منهم يعني... 

ثريا بحده 

ما تقاطعنيش تاني وانا بتكلم، بصي يا نور انتي جميله ومتعلمه وتنفعي تكوني مرات الدكتور احمد رياض بس انتي لوحدك من غير اهلك، انا مش همنعك تزوريهم بس في الوقت اللي انا اقول عليه لكن قدام معارفنا انتي اهلك ميتين... 

نور بضيق 

بس يعني الفرح وو وهما لما يحبو يطمنو عليا اا.. 

ثريا بهدوء

هتبقي مرات احمد رياض وهتبقي من احسن واغني البنات في مصر لبسك وشكلك ومكانتك كل حاجه خاصه بيكي هتتغير... 

اتملت عيون نور دموع وثريا كملت كلامها

فكري يا نور دلوقتي فكري وردي عليا، بس افتكري ان الفرصه بتيجي مره واحده في العمر.. 

مسحت نور دموعها وقالت

انا موافقه، المهم عندي اكون مع احمد.. 

ابتسمت ثريا وقالت

برافو عليكي تبلغي اهلك بقي انك هتيجي عندنا من بكره عشان نعرفك علي قرايبنا ومعارفنا وبعدين نعمل الفرح... 

بصت نور للخاتم اللي في ايدها وقالت

حاضر يا طنط.. 

قامت ثريا وقعدت جنبيها وقالت

لا لا انا من النهارده ماما وتسمعي كلامي في اي حاجه بقولك عليها ماشي يا حبيبتي.. 

نور حاولت تبتسم وقالت

حاضر يا ماما.. 

ـــــــ #بقلم_الكاتبه_رحاب_القاضي ـــــــ 

_ وبالليل في بيت شهد كانت واقفه قدام المرايه وباصه لنفسها وهي لابسه فستان بسيط من اللون الموف وحاطه حجابها ودخلت عندها زهره وقالت وهي مبسوطه.. 

زهره 

اقسم بالله انتي لما هتشوفي العريس هتنسي اي رفض وهتقولي جوزوني بكره.. 

كانت شهد ساكته وقربت منها زهره وقالت

يا بت مالك بقي كفايه يا شهد ليه بتعملي فينا كده يا بنتي احنا عايزين نفرح بقي.. 

شهد بدموع 

نصيبي يا زهره ما اشوفش فرح هطلع دلوقتي اسلم عليهم ولا امتي.. 

زهره

تعالي الاول احطلك شوية مكياج عشان يداري الكدمات اللي في وشك دي.. 

_ وبره كان قاعد يونس مع صبري وحامد وعظيمه وجنبيه بطه اللي كل شويه تقرب منه وتقول.. 

بطه 

مبروك يا يويو.. 

يونس بغيظ

عارفه يا بطه لو ما اتلمتيش هنفخك اخرسي خالص.. 

بطه بقلق

انت اتحولت كده ليه خلاص سكت، اهي العروسه طالعه... 

_ بصلها يونس بحده وبعدين بص ناحية شهد واول ما شافها ابتسم تلقائياً وبطه قالتله.. 

بطه 

مزه العروسه مش كده... 

يونس بحده 

لينا بيت هنروح فيه يا بطه بس اللي ما يزعلش.. 

بطه بخوف

والله العظيم ما هفتح بوقي تاني.. 

عظيمه وهي بتحضن شهد 

الله واكبر الله واكبر تعالي سلمي علي عمك وعريسك شايف الحلاوه والجمال يا حامد.. 

سلمت شهد علي حامد اللي قالها

بسم الله مشاء الله ليه الحق اخوكي يقفل عليكي وما يخليش حد يشوفك.. 

_ابتسمت شهد بمجامله واول ما عينها جات علي يونس وقفت مكانها وصبري قال.. 

صبري بقلق

سلمي علي يونس يا شهد.. 

وقف يونس ومد ايده وقال

ازيك يا شهد... 

_ سلمت عليه بطرطيف صوابها وراحت قعدت بسرعه جنب زهره، وهو كتم ضحكته علي تصرفاتها وقعد مكانه تاني.. 

حامد بصله بخبث وقال

انا بقول نقرا الفاتحه وبعدين نتفق كده كده مش هنختلف علي حاجه.. 

صبري ابتسم وقال

اللي تشوفه يا حج حامد نقرا الفاتحه.. 

_ بدأو كلهم يقرو الفاتحه معادا شهد اللي اتوترت اكتر وكانت مدايقه جداً، ورفعت عينها وبصت ليونس اللي هو كمان بصلها وغمز من غير ما حد ياخد باله فبصت بسرعه للارض ووشها قلب احمر... 

عظيمه

قومي يا بطه مع خطيلة اخوكي واقعدو في البلكونه شويه وانت يا يونس روح معاهم وسيبونا احنا بقي الكبار مع بعض ده بعد اذنك يا اسطا صبري.. 

صبري بص لشهد بقلق وقال

البيت بيتكم يا ست الناس اتفضل يا معلم يونس.. 

_ قامت شهد وراحت بطه مسكت في دراعها وقالت  بحماس.. 

بطه 

تعالي بقي انا عايزه اتكلم معاكي في حاجات كتير... 

_ ودخلو هما التلاته البلكونه... 

ـــــــ #بقلم_الكاتبه_رحاب_القاضي ـــــــ

_ وفي بيت الشيخ محمد اتعشو كلهم مع بعض وقالت وهاجر.. 

هاجر

دقيقه واحده يا محمد هعملك الشاي.. 

هناء قامت وقالت

لا يا حلوه اقعدي انتي، ابني تلاقيه وحشو الشاي بتاع مامته وانا اللي هروح اعمله كوباية شاي مش لون شاي زي اللي بتعمليه.. 

قعدت هاجر وقالت 

طيب يا حماتي اذا كان كده بقي اعمليلنا كلنا شاااي.. 

هناء قعدت وقالت 

ليه ان شاء الله هو انتي فاكراني شغاله عندك، مش هعمل شاي لحد.. 

وقف محمد وقال

خلااص انا هقوم اعمل الشاي وجااي.. 

دخل محمد المطبخ وهناء قالت لمازن بحده

انت مرزوع عندك ليه اتنيل قوم لم الاكل ده... 

مازن بضيق

في ايه يا ماما ما قدامك هاجر اهي هتقوم تلمه دلوقتي.. 

زعقت فيه هناء وقالت

هي هاجر دي الشغاله اللي جبهالك اخوك ما انت قبل ما تيجي هاجر كنت بتعمل كده، اتنيل قوم لم الاكل يلا ويكون في علمك لا انا ولا هاجر في الاجازه هنعملك حاجه... 

مازن بضيق

يعني ايه بقي الكلام ده؟.. 

هناء بحده

يعني مش اكل ومرعي وقلة صنعه المصروف مش هتاخده عايز فلوس انزل اشتغل مع اخوك وكل يوم زيك زي اللي شغالين عنده ولو عايز شاي او حاجه تعملها لنفسك.. 

مازن بضيق

ماشي يا ماما اللي عايزااه.. 

_ وقام فعلا مازن عشان يشيل الاكل وقعدت هناء مدايقه، قربت منها هاجر وقالت... 

هاجر

مالك يا طنط في حاجه غريبه معاكي.. 

هناء بدموع وصوت واطي

الصبح كنت بروق اوضة البيه ولقيت عنده تحت المرتبه سجارتين حشيش عرفتهم لاني كنت بشوف الحاجات دي عند ابوه زمان.. 

هاجر بصدمه 

يا نهار مش فايت طيب انتي هتعملي ايه هتقولي لمحمد؟ .. 

هناء بسرعه قالت

لا لا لا محمد ايه اللي اقوله ده كان يشرب من دمه، الواد خرب يا هاجر لا بقي بيصلي ولا بيذاكر وموبيله كله محادثات مع بنات وحاجه تقرف واخرها اللي قولتهولك ده.. 

هاجر بضيق

طيب ما انتي كده لازم تقولي لمحمد عشان يشد عليه شويه.. 

هناء بهدوء

مش محمد اللي ينفع في الموقف ده، انا اتصرفت وروحت للي يقدر يساعده.. 

هاجر بفضول 

مين روحتي للاكس ولا ايه؟.. 

هناء بعدم فهم

مين هو الاكس ده ان شاء الله؟.. 

هاجر غمزتلها وقالت

حمايا العزيز الراجل واقع عليكي يا حماتشي حتي وانتي قلبوظه في نفسك كده.. 

اتوترت هناء وقالت 

انتي ايش دخلك اصلا اوعي كده من وشي... 

_ دخلت هناء بسرعه اوضتها ومازن طلع من المطبخ وطلع بره البيت وهو مدايق، ومحمد قعد جنب هاجر وقال.. 

محمد

هما نامو اومال انا عامل الشاي ده كله لمين.. 

هاجر

انا هشربه مدام جايب كيك معاه.. 

محمد

هتشربي تلات كوبيات شاي يا هاجر.. 

هاجر بضيق 

ما كنتش بخيل لما اتجوزتك يا محمد في ايه؟.. 

محمد قرب منها وقال

انتي عارفه اكتر حاجه بحبها فيكي لما تنطقي اسمي بيكون بطريقه مختلفه كده.. 

هاجر بتوتر

احمم ودي بس بقي اللي بتحبها فيا.. 

محمد ابتسم وقال

لا هو في كتير بس احنا في الصاله وفي شقة امي واخده بالك انتي.. 

بعدت عنه هاجر وقالت

والله طيب اوعي بقي، وبعدين انت هتصلحلي موبيلي امتي؟.. 

محمد

وديته للراجل وقالي بكره اخده منه.. 

هاجر بخبث

طيب عايز فلوس يعني انا معايا المرتب بتاعي.. 

محمد بحده 

بس يا عسل اسكتي، قوليلي صح ولاء اختك عامله ايه؟.. 

اتنهدت هاجر بحزن وقالت

ماما بتقول بقالها فتره لا بتخرج ولا بتقابل حد ولا قابله كلام من حد اصلا.  

محمد 

بصي افضي كده وتخليها تيجي هنا او نتقابل في اي مكان بره وعايز اتكلم معاها ممكن؟.. 

هاجر ابتسمت وقالت

حاضر يا شيخ محمد.. 

ـــــــ #بقلم_الكاتبه_رحاب_القاضي ـــــــ 

_ وفي بيت صبري كانت شهد ويونس قاعدين في البلكونه ومعاهم بطه اللي قالت.. 

بطه 

قوليلي بقي يا شهد انتي واخده ايه تعليم؟.. 

شهد بتوتر

اا ثانويه ازهريه... 

بطه 

وما كملتيش ليه، ما جيبتيش مجموع يعني؟.. 

_كان يونس مركز عليها وده موترها اكتر، وردت علي بطه وقالت... 

شهد 

لا اا انا كنت طالعه الاولي علي المعهد الازهري كله بس صبري اخويا شاف اني اقعد في البيت احسن.. 

بطه بصت ليونس وقالت

طيب انا هرد بقي علي رسايل صحابي علي الموبيل وهحط السماعه في ودني لو عايزين تتكلمو اتكلمو مش هكون سامعه حاجه.. 

يونس بجمود

براحتك خالص قربنا نروح اهوو.. 

بطه بحده 

هو انا عملت حاجه دلوقتي ايه الظلم ده.. 

يونس بحده 

اتلمييي ومبرطميش كده احنا في بيوت ناس، بس نروح البيت يا بطه.. 

_ حطت بطه السماعه في ودنها وشهد كانت بتبص ليونس بقلق وخوف من طريقته وهو بصلها وقال.. 

يونس

العفريت ما ظهرش تاني؟... 

_ابتسمت شهد غصب عنها وردت عليه بكل هدوء وقالت..  

شهد

لا.. 

يونس 

طيب كويس هو انتي كنتي تعرفيني مش كده؟.. 

شهد بسرعه 

لا والله العظيم انا ما كنتش اعرفك، انا اصلا مش بخرج كتير من البيت فمعرفش حد... 

يونس بجمود

كويس برضو انك ما تعرفيش حد... 

_ وسكت يونس وهي كمان سكتت وطلعو بعد شويه بره وحامد وقف وقال لصبري.. 

حامد

كده اتفقنا يا صبري يا ابني الخميس الجاي يونس ياخد عروسته والست ام اسر ويجيبو الدهب ونكتب الكتاب بالليل... 

يونس قال بسرعه

والخميس اللي بعده الفرح.. 

_ الكل سكت وبصوله بصدمه وعدم فهم اللي قاله، وخصوصاً شهد اللي الخوف سيطر عليها اكتر... 

حامد 

يا ابني احنا اتفقنا علي كتب كتاب عشان يقدرو يظبطو حالهم.. 

يونس بجديه 

وانا مستعد اجيب كل حاجه بس الفرح يبقي مع كتب الكتاب كمان، واللي تحتاجه يا اسطا صبري انا تحت امرك فيه.. 

_جات شهد ترفض بس صبري مسك ايدها جامد وقال بسرعه.. 

صبري

وانا موافق اصلا ام اسر مكفياها جهاز من كل حاجه مش فاضلنا غير حاجات بسيطه يبقي الخميس الجاي كتب الكتاب واللي بعده الدخله.. 

_ فضلت زهره وعظيمه يزغرتو ويونس بص لشهد اللي الدموع ملت عيونها وبان اووي عليها الانزعاج... 

ــــــــــــــــــــــــــــــــــــــــ 

_ وفي بيت الشيخ محمد كانت الساعه اتنين بعد نص الليل وكان محمد نايم وهاجر جنبيه وسمعو صوت صويت عالي جاي من بره، وقامو هما الاتنين مفزوعين.. 

هاجر بخوف

في ايه مين اللي بيصوت كده؟... 

قام محمد وقال وهو رايح للبلكونه

مش عارف مين اللي بيصوت كده... 

_ وبعد اقل من دقيقه طلع من البلكونه بسرعه وطلع بره الاوصه وقامت هاجر وقالت بقلق.. 

هاجر

استني يا محمد قولي في ايه... 

رد عليها محمد وهو نازل بسرعه

المحل بتاعي بيولع تحت يا هاجر... 

هاجر بصدمه وخوف

ايييه؟؟!.. 

_ تفتكرو بقي مين اللي عمل كده في محل محمد؟ 

_وايه السر اللي شهد مخبيااه؟.. 

ـ نتقابل الحلقه الجايه.. 

ـــــــ ـــــــ ـــــــ ـــــــ ـــــــ ـــــــ ـــــــ 

#بقلم_الكاتبه_رحاب_القاضي

           الفصل الثاني عشر من هنا

لمتابعة باقي الرواية زوروا قناتنا على التليجرام من هنا

تعديل المقال